الورش وهاذا ماحصل معي

25 4

لايمكنك التصويت حتى الحصول على 20 نقطة على الأقل
إضغط هنا للإخفاء

الرفاعي33 13918
قبل 10 سنه

السلام عليكم ورحمة الله وبركاته
اسعد الله اوقاتكم بكل خير
كيف الاعضاء عساكم مبسوطين ومرتاحين دوووم يارب
مانطول عليكم 
اليوم جايبلكم موضووع عن الورش والسباكين ياكثرهم
وياما نااس يطلعلة خراب ويغير قطع وهي في الاساس سليمه 

واحيانا يطلعلك خراب او صووت وتكلفته بسيطه 
مثل ماحصل مع اخوكم الرفاعي

قبل فترة طحت في حفرة بموتري الكامري
وبعدها باسبووع طلع عندي صوت طقطقه مع لف الطارة يسار
بمعنى الف يسار او اخذ دوار يطلع صووت
الف يمين مايطلع الصوووت 
يوم بعد يوم يزيد الصووت وانا من الناس الي مايداني هالاصوات
يعني يجيني قلق وما ارتاح
المهم رحت لصناعية جدة جنوب جدة بجنب المعارض اكيد تعرفونها
سألت ودلوني على واحد اسمه فيصل فلسطيني
شغلته مساعدات وتربيط والامور هاذي
وصلتله وجرب الموتر وقلتلة تلف يسار الصوت يطلع يمين
جرب وقالي ابد علاجها عندي والصووت يسار
قلت الله يرضى عليك الصوت يمين
قالي يعني انت افهم مني هاذي شغلتي والصوت يسار
بس انت يتهيألك انه يمين
قلت طيب وش المطلوب 
قالي المطلووب رمان يسار
قلت اوكيه اجيبلك رمان بس شرط قبل ماتفك
اذا ماراح الصووت تتحمل فلوس القطعه وشغل اليد
والله فكر الرجال قالي ولا يهمك اتحمل كل شي
واثق الرجال ههههههههه
المهم ياشباب شريت القطعه رمان كفر
ولعلمكم رمان الكامري والاوريون والافالون واحد 
يعني عندك افالون ماعندك مشكلة اطلب رمان كامري او اوريون نفس القطعه
شريتها ب300 غالية بالحيل 
جبتها له وفكها وكبسها في المخرطه
وانا شاك ان الرمان سليم بس قلت دام بيتحملها مو مشكله
ركب وشغلنا وجربنا والا والله كانك يابو زيد ماغزيت
ولا تغير شي
والله واطالع فيه ويطالع فيني هههههههه تغير وجهه تورط
قلت هاه يافيصل الله يهديك تطبب في الموتر
بالحرام ماعنك وعن 300 تدفعها ريال ينطح ريال
قال يارجال احنا اخوان وانا من مواليد السعوديه خلها بالنص بيني وبينك
قلت يحرم الا تدفعها كامله ومن مواليد السعودية على عيني وراسي
بس ماترضاها على نفسك
قال تدري هاذي 300 بس طالبك طلب
قلت امر وش طلبك قال الصووت هاذا ماعني وعنه لازم اطلعه
قلت ماعندك مشكلة 
رجعنا للورشه فك مسمار التوازن يسار وشحمه وركب 
جربنا زي ماهو ماتغير شي
الرجال ارتفع ضغطه
رجعنا فك مسمار التوازن يمين شحمه وظبطه
وركبه
جربنا والا والله راح الصوت غادر نهائيا
طالعت فية قلت انا وش قلتلك
الصووت يمين وانت تقول يسار
والله اني افهم منك
ضحك وسكت عطيته 200 ريال على شغلة وتعبة 
وقلت يافيصل لاعاد تطبب في سيارات الناس
قال ابشر
ومشيت والى الان الصوت ماعاد رجع واذا رجع بغير مسامير توازن جديد
الهدف من الموضوع ياشباب
عندك صوت ورحت لورشه وقالك انا الوعل ابو قرنين وحلها عندي
اشرط عليه ماراحت المشكلة يتكفل بكل شي 
الدنيا ماهي فوضه والقطع كل مالها تزيد خاصتا تويوتا
الصورة الاولى صورة توضيحية لمسمار التوازن
والصور الباقية اهديها لكم صور كامري امريكي لبى قلبها
ولا تلوموني في الامريكي 
التويوتا حلوة بس ليت الوكيل في السعودية
يجيبها مثل الامريكي
على الاقل 7 ايرباج
الصورة الاخيرة كامري امريكي 2005 فل الفل وبتلاحظون
تحت المكيف زرين تسخين وهاذي ماجت حتى في القراندي الفل كامل
ربي يسعدكم ويوفقكم
اخووكم الرفاعي33

إبلاغ

الردود